Heimisbach - Simon Gfeller - Страница 1 из 355


us em Bureläbe     Edition Francke
im Cosmos Verlag
Muri-Bern
[1986]     Meinen Freunden
Otto von Greyerz und Emil Günter
gewidmet Es Burespinnetli im Hingerhuus
«Ju-hu-hu-hui!» tönt’s dür ’sch
Tääli uus; Schwarz Hans, der Chäser, Jöggi, der
Hüttechnächt u der Ärnscht Hälfer, wo sit em
Herbscht z’Heimisbach hinger Schumeischter ischt, wei i ’s
Hingerhuus z’Obesitz. Es isch Stei u Bei gfrore.
Schuehtöif lyt uf beedne Syte vom Strößli der Schnee.
Uber d’Höger yhe het si der Wald etschlage ; aber im
Tääli nide hangen alli Stöderli voll Biecht .
D’Oberflechi vom Schnee gseht uus wi ne bürschtedicke Wase
vo wyßgfrornigem Chranzmiesch. Die Schneestüdeli zwitzeren
im Mooschyn, es ischt e häli Pracht. Es gseht uus, wi we
Füürflämmli luschtig druber tanzeti. Näb em
Strößli zuehe louft i wunderlige Chrümpline der
Heimisbach. Aber pressiere tuet’s ihm naadischt nid hert.
D’Chelti wott ne schier z’dicke lege ; er stoglet si u
blybt an allne Stude hange. Um so ärschtiger loufe die drei
Obesitzler dür e Heimisbach-Grabe hingere. D’Chelti
schryßt ne schier ’s ober Ääri ab, u bime
n-jedere Schritt gyxet u gyret ne der Schnee unger de Schuehsole.
Öppe zähe Minute hinger der Heimisbach-Chäshütte
geit e Charrwäg linggs ab gäge de
Heimisbach-Burehüseren uehe. Bim Vorderhuus füehrt er grad


-10     пред. Страница 1 из 355 след.     +10